• دُلي

سياحة داخلية: أكواخ خشبية في جرش

صار لي فترة عم ببحث عن مكان مبيت في الأردن فريد من نوعه. وما أحلى المفاجأة لما طلعت لي دعاية على Instagram عن أكواخ خشبية موجودة في جرش، في مخيم اسمه مخيم رينجر.

سياحة داخلية: أكواخ خشبية في جرش

الصور كانت جميلة جدا ومش مثل أي شيء شفته من قبل! كنت دايما بشوف هذه الأكواخ على الإنترنت، وبعملها save عشان أبيت فيها في رحلاتي القادمة، فمش ممكن تتخيلوا فرحتي لما اكتشفت انه هاي الأكواخ بعيدة فقط ساعة عن عمان!


طبعا زي كل رحلاتي هاي السنة، كان كلشي مقرر عالسريع، والشناتي مضبوبة وبتستنى بالرحلة. في هاي المدونة رح أحكيلكم أكثر عن مخيم رينجر، كيف طبيعة الأكواخ، والطعام، وشو النشاطات اللي ممكن تعملوها هناك.

سياحة داخلية: أكواخ خشبية في جرش

اسم الموقع: مخيم رينجر Jordan Ranger Camp

المنطقة: جرش

التكلفة لليلة الواحدة: ٨٠ دينار للشخصين (ثم ٢٥ دينار لكل شخص زيادة)

شو بتشمل التكلفة؟ مبيت في أكواخ خشبية، وجبة عشاء، وجبة فطور، وhike مع دليل مختص، ماء وقهوة وشاي ومشروبات غازية.


اليوم الأول

وصلنا لموقع مخيم رينجر اللي بيبعد عن عمان ٤٥ دقيقة، وكنا مستعدين لننفصل عن العالم، ونستمتع بعطلة نهاية أسبوع بعيداً عن ضجيج المدينة وسرعة الحياة في العاصمة.

سياحة داخلية: أكواخ خشبية في جرش

بحب من هلأ أحكي انه الكهرباء موجودة فقط ٥ ساعات في المخيم (٧-١٢ مساءاً)، فهذه أحلى فرصة انكم تجيبوا معكم هذا الكتاب اللي صارلكم شهرين بدكم تقرأوه، أو هاي الرسمة اللي مش ملاقيين وقت تخلصوها، أو اللعبة اللي بتحبوا تلعبوها مع اصحابكم، أو أو...

أول ما وصلنا استقبلونا طاقم العمل في المخيم، وورجونا كل المرافق والصالات اللي هناك، وأخذونا على الكوخ مشان نحط أغراضنا.


الأكواخ خيالية!

سياحة داخلية: أكواخ خشبية في جرش

يحتوي مخيم رينجر على بيوت معلقة على الشجر treehouses، و٨ أكوخ خشبية، وبيتتين حجر، و٢٣ خيمة. احنا كنا ٥ أشخاص فاستأجرنا أكبر كابينة خشب، اللي تسع ل٧ أشخاص واسمها Rangers Cabin.

سياحة داخلية: أكواخ خشبية في جرش

تصميم الكوخ عصري وجميل، والمفروشات كلها جديدة ومريحة، ويوجد فيها تلفزيون، وثلاجة صغيرة، وابريق ماء كهربائي.

بس أحلى ما كان في الكوخ هو البلكونة أو الشرفة الخشبية المطلة على الغابات الجرشية الهادئة. تخيلوا معاي، انتو قاعدين عالبلكونة، عم تشربوا شاي أو قهوة ونسيم الخريف الجبلي عم بلعب حواليكم، الدنيا هدوء ومش سامعين صوت أي اشي غير حفيف الأشجار، وممكن صوت الأغاني الخافت اللي حاطينه على موبايلكم. خيال لأ؟

سياحة داخلية: أكواخ خشبية في جرش

بعدما جلسنا شوي في الكوخ شوي صار وقت الhike مع المدرب المسؤول في المخيم. النشاط هذا اختياري لكن بنصحكم فيه كتير... بتمشوا في الغابة وبتتعلموا عن أنواع الأشجار والثمار في المنطقة وبتستكشفوا مناظر غابات عجلون وجرش الخلابة!

سياحة داخلية: أكواخ خشبية في جرش

بعد المشي اجا وقت العشاء. الاشي الحلو في مخيم رينجر انه المواعيد جداً flexible، يعني انت اللي بتختار وقت الفطور والعشاء، والأكل بيجي للغرفة! العشاء كان مشاوي شيش طاووق وكفتة، مع نوعين سلطة، وحمص، وبطاطا مقلية، بالإضافة للمشروبات باردة.

سياحة داخلية: أكواخ خشبية في جرش

بعد العشاء، كان في جلسة حوالين النار وقعدنا نلعب ألعاب مع المسؤولين في المخيم، ونسمع قصص عن كيف بدأت فكرة المخيم، وبآخر القعدة شربنا شاي مغلي مع النعنع عالحطب، وتوجهنا لأكواخنا بعد يوم جميل.


برجع بعيد انه بعد الساعة ١٢ مافي كهرباء إلا ضوء صغير موجود في الغرفة، فاللي بده يشحن موبايله لازم يجيب portable charger، أو يشحن قبل الساعة ١٢.

بعد هيك قعدنا نلعب board games في الغرفة للساعة ٢ على أضواء موبايلاتنا!

اليوم الثاني

صحينا اليوم التاني على راحتنا على الساعة ١٠، وطلبنا ماء مغلية مشان نعمل قهوة في الغرفة. زي ما ذكرت في أول المدونة، المشروبات الساخنة، والماء، والمشروبات الغازية (مع الوجبات) كلها مجانية، المهم عملنا أطيب قهوة وقعدنا نشربها على الشرفة. الهدوء في الصباح، صوت الأشجار، صوت العصافير، ورائحة القهوة بتعطي انتعاش جديد للنفس قبل الرجوع لروتين حياتنا.

سياحة داخلية: أكواخ خشبية في جرش

اجا وقت الفطور! الفطور مميز جداً وكله من منتجات محلية ويتضمن: بيض مقلي، زيت وزعتر، ولبنة جرشية، وجبنة بيضاء، ولبن، وزبدة بلدية وحلاوة وخبز طابون طازج! الأكل طيب وطبعاً على فيو... شوفوا الصورة!

سياحة داخلية: أكواخ خشبية في جرش

بعد الفطور كل واحد قرر يعمل اشي.. اللي راح على hike تانية، واللي راح يلعب شدة، واللي قعد يقراء كتاب...

سياحة داخلية: أكواخ خشبية في جرش

اسمتعت كتير في هذه التجربة بس أكتر اشي حبيته في المخيم، هو كيف الحياة بتمشي أبطأ، وبتصير أهدا لما تكون محاط بالطبيعة الشجرية الحلوة والناس اللطيفين.

بنصح عشاق الطبيعة أو أي شخص يبحث عن هدوء بال واستجمام، أنه ما يفوت هذه التجربة الحلوة ويشجع السياحة الداخلية يروحوا عليه. اتذكروا انه مفتوح في هذا الموسوم، حتى في أوقات الحظر الشامل كل جمعة وسبت!

بتعرفوا انه عندي كمان مدونات عن السياحة في الأردن؟ اكبسوا هون للمزيد من المدونات عن السياحة الداخلية


11488 عرض0 تعليق