• دُلي

كيف أسافر من الغرفة للمطبخ، للقعدة للغرفة، ببلاش!

تم التحديث: 1 أبريل 2020


مرحبا يا حلوين، قبل أسبوعين قررت أسافر من الغرفة للمطبخ للقعدة للغرفة ببلاش وأنا هون جاي أحكيلكم كيف!


بس أول شيء اللوجستيات:

النومة: طبعاً وكالعادة الكل بعرف قديش بحب الairbnb وهاي المرة لا تختلف! الشقة اللي لاقيتها كتير حلوة وبس ترجيت أهلي شوي، أعطوني الغرفة ببلاش (مع كمان نزيلة بالغرفة بس يللا شو بدنا نعمل) فتخيلوا قديش وفرت مصاريف في هاي الرحلة!

صورة للنزيلة مع كلبها.. أول ما فرجتني الصورة خف عقلي.. حرام شوفوا شو بتعمل فيه

العملة: الدينار الأردني. الحلو بهاي السفرة انه ما كان في مطاعم وأماكن مفتوحة مما قلل المصاريف بشكل خرافي واقتصر على الأشياء الأساسية اللي ممكن الواحد يحتاجها للسفرة مثل الماء (ببلاش لأنه البابا بدفع)، وجبتين في اليوم (ببلاش لأنه البابا بدفع)، الكهرباء (ببلاش مشان الحكومة أجلت فواتير الكهرباء للشهر الجاي).


المواصلات: مشياً على الأقدام. الحلو بهاي السَفرة انه ما في وسائل المواصلات في البيت فالتكاليف هون بتختفي فبضللكم مصاري اكسترا للشوبينج (برضوا ببلاش مشان كلنا عارفين انكم بتسرقوا أواعي من خزانة اخوانكم).


الانترنت: سرعة الانترنت ما كانت بزيادة بالairbnb ورح أكتبلهم هيك بالreview عالويبسايت


اليوم: الأول

الفطور

فقت الساعة ١٠ الصبح متحمسة آكل فطوري المفضل (بيض وسالمون) بس للأسف ما كان السالمون متوفر في الairbnb اللي كنت فيه فقررت أفشق الفطور وبس أشرب قهوة معمولة من إيدين صحاب البيت الكتاكيت الله يخليلي ياهم.

صحاب الشقة الكتاكيت

النشاطات الصباحية

مع إنه عادة ما بشتغل خلال السفر بس هاي المرة اضطريت أشتغل من الairbnb تبعي.. صاحبة الairbnb كانت لطيفة جداً وقالتلي بصير أشتغل في الزاوية في غرفة القعدة بس إذا صوتي واطي... طبعاً وافقت مشان فوق ما مقعديني همة ببلاش بدي أتفلسف عن وين حاطيتني؟ ما علينا..


تجارب سفر airbnb Experiences

في أوبشن على ويبسايت airbnb غير النوم وهو experiences (تجارب السفر). في وحدة من تجارب السفر كتير لفتت انتباهي وهي الطبخ مع عائلة محلية. في هاي التجربة بعلموك عن الأكل المحلي وبالآخر بتاكل معهم، فقلت لازم أسجل مشان أثري ثقافتي في المطبخ.

بصراحة بنصح بهاي التجربة، بس ديروا بالكم يضحكوا عليكم ويخلوكم تجلوا الجلي، مشان سمعت انه هيك بعملوا بالسياح! كمان نصيحة مني كمان انكم تحددوا وقت معين لهذا النشاط لأنه فتح عين غمض عين ولا كل الرحلة وانتوا بس قاعدين بالمطبخ!


النشاطات الليلية

صحاب البيت كل ليلة بعزموني على فيلم في غرفة الجلوس... أول شيء حسيت الموضوع غريب لأنه أنا بairbnb بس بعدين توكلت عالله وطلعوا ناس محترمين جداً.


اذا حابين تغيروا جو شوي شوفوا هاي المدونة: قبرص.. صور من الأرشيف


اكتشفت بعد بيومين انه في نزيل آخر بالبيت بس ما كنا نشوفه لأنه كان ينام الصبح ويفيق بالليل، بس قدرت آخدله صورة نادرة بعدسة كاميرتي!

النزيل الآخر في المنزل

اليوم: الله أعلم إيش بطلت أعد بعد العشرة

فقت بعرفش أي ساعة.. قديش الساعة.. أصلاً شو اليوم.. وين أنا.. شو عم بصير هون..

وهيك بتكونوا عرفتوا كيف تسافروا من الغرفة للقعدة للمطبخ للغرفة، ببلاش.. وبعتقد لازم أنهي هون قبل ما ماما وبابا يشوفوا هاي المدونة وينيموني بالشارع هههه! Stay safe everyone ❤️


اذا بدكم تقرأوا مقالات حقيقية أنا كتبتها عن السفر اكبسوا هون: https://www.thedollztertravels.com/blog

1928 عرض0 تعليق