كان لا عالبال ولا عالخاطر إنه نروح لسريلانكا لشهر العسل. الخطة الأصلية كانت روسيا، وحجزنا كل الطيارات والفنادق، وحتى بعض المطاعم اللي بدنا نروحها، فكانت صدمتنا الكبيرة إنه تأشيرتي انرفضت قبل 5 أيام من العرس. مصيبة! شو بدي أعملّ ووين بدنا نروح؟!
بعد بضعة مكالمات مع مكاتب سياحية، اكتشفنا إنه سريلانكا فاتحة للزوار من جميع البلدان (بشرط أخذ اللقاحين)، فحجزنا مع مكتب سياحة، رزمة (package)، لمدة 13 يوم في 5 مدن في سريلانكا!
سريلانكا من أجمل الدول الخضراء اللي زرناها بحياتنا! وبهاي المدونة رح أحكيلكم (كالعادة) وين رحنا، وشو شفنا، وشو أكلنا.. وكل هالأشياء الحلوة!
12 يوم في سريلانكا: شو أعمل، ووين أنام، وشو آكل؟
بس أول شي: اللوجستيات
التأشيرة: تأشيرة الكترونية بتقدروا تحصلوا عليها من هون والتأشيرة طلعت خلال ساعة فقط من التقديم!
الطيران: في أكم من طيران من عمّان إلى كولمبو، إحنا اخترنا الخطوط الجوية القطرية لأنه الرحلة بعيدة نسبياً (10 ساعات مع ترانزيت). الخطوط الجوية القطرية كانت خرافية، والطيارات جديدة، ومطار الدوحة بجنن!
العملة: روبية سريلانكية. المعادلة اللي بتقدروا تستخدموها للتحويل هي كل 1000 روبي سريلانكي = 5 دولار أمريكي.
المواصلات: السواقة صعبة كتير في سريلانكا، لأنه أولاً بسوقوا عالشمال وثانياً الشارع كله باصات وسيارات وموتورات وتوك توك، والكل بتجاوز عن بعض، فمن الأفضل حجز دليل سياحي أو سائق لكل الرحلة، السواقة خطيرة إذا انت مش من سكان المنطقة. أما بالنسبة لمدينة كولمبو، فبإمكانك استخدام التوك توك المتواجد بكثرة وفي كل الشوارع!
طريقة الحجز: سافرنا مع مكتب سياحة اسمه الخيول الذهبية للسياحة. المكتب بأمن لك دليل سياحي، وهو نفسه بدبر مين يسوق فيك كل مكان خلال الإقامة، بالإضافة إلى عمل حجوزات الطيران والفنادق، وترتيب الرحلات (إذا كان بدك).
أول مدينة: تانجالي Tangalle
المبيت: منتجع أنانتارا بيس هافن تانجالي Anantara Peace Haven Tangalle
من أجمل الفنادق اللي بنزل فيهم بحياتي. المنتجع ضخم جداً وعنده شاطئ هادئ ومنفصل عن ضجة المدينة. المرافق فاخرة والبركة واسعة جداً ومطلة على المحيط. الفندق بحتوي على مطاعم عدة منها مطعم سريلانكي، مطعم هندي، مطعم إيطالي، مطعم ياباني، بالإضافة إلى وجود food experiences خاصة لنزلاء الفندق اللي حابين يعملوا اشي غير!
أما بالنسبة للغرفة، لما وصلنا المنتجع اكتشفنا إنه مكتب السياحة حاجز النا فيلا مع بركة خاصة، برضو مطلة على المحيط. من أحلى اماكن الإقامة في سريلانكا، وإذا بتقدروا تحجزوها مش لازم تفوتوا التجربة!
في مدينة تانجالي صحت لنا الفرصة إنه نتعشى عند عائلة سريلانكية، وناكل الأكل المحلي من ايدين سيدة ام لعائلة هناك! الطعام السريلانكي كتير طيب، ومن اللي سمعته من عدة أشخاص سافروا على سريلانكا، إنه أغلب المرشدين السياحيين بقدروا يدبروا مثل هيك عشاء عند طباخين محليين ماهرين بعرفوهم! كان الأكل كميات هائلة ودفعنا بس 15 دولار وكنا وقتها 3 أشخاص، مع العلم أنه الأكل كان ممكن يكفي كمان شخصين بسهولة!
ثاني مدينة: جالي Galle
تبعد مدينة جالي عن مدينة تانجالي حوالي ساعة بالسيارة، وهي مدينة على المحيط مباشرة، مما يجعلها خيار مناسب لرحلة (صد رد) من المنتجع في تانجالي. وقعت مدينة جالي تحت سيطرة البريطانيين والبرتغاليين والهولنديين، وهذا كله يظهر في الفن المعماري في كل نواحي المدينة.
من الأماكن اللي يجب زيارتها في جالي حصن جالي الهولندي، وهو أحد مواقع التراث العالمي لليونسكو. يحتوي الحصن على مواقع أثرية عدة منها:
· المستشفى البريطاني اللي تحول الآن إلى مجمع مطاعم مطلة على البحر
· برج الساعة في قلعة جالي
· البوابة القديمة
· الكنيسة الهولندية
· البلدة القديمة
· أسوار الحصن
· المنارة
بعد التمشي في الحصن العريق وتناول الطعام والبوظة الزاكيين، بتقدروا تتوجهوا لشاطئ في طريق الرجعة إلى تانجالي، اسمه شاطئ هيريكيتيا. رمال الشاطئ ذهبية والأمواج مرتفعة، مما يجعله مكان مناسب لتعلم ركوب الأمواج. يمكنكم استئجار لوح الركمجة من الكشك الموجود على الشاطئ، بالإضافة إلى شرب عصير جوز الهند الطازج من جوز الهند البرتقالي، بينما تستمتعون بالمناظر الطبيعية الخرافية!
ثالث مدينة: هامبانتوتا Hambantota
تشتهر مدينة هامبانتوتا بحديقة يالا الوطنية. الرحلة تأخذ تقريبا ساعتين من مدينة تانجالي، لكن الطريق مسلية جداً وكلها غابات وأشجار غريبة! رحلة السفاري في حديقة يالا الوطنية شيء مش لازم تفوتوه على حالكم. مدة اللفة في الحديقة 3-4 ساعات وبتشوفوا فيها فيلة، وطواويس، وجواميس وفهود ونسور وتماسيح وغزلان، وغيرها من الحيوانات الغريبة والجميلة.
الحلو بالسفاري هو إنه بعكس حديقة الحيوانات، إنتوا اللي بتكونوا بمكان مغلق (جيب jeep) والحيوانات عم بتعيش حياتها الطبيعية في الغابة.
بعد الرحلة رجعنا بكير على المنتجع في تانجالي لأنه كان ورانا يوم طويل من السفر اليوم التالي!
رابع مدينة: إيلا Ella
صحينا بكير من مدينة تانجالي لنتوجه لمدينة إيلا وصولاً لمدينة نوارا إليا.. بس بعدين بنحكي عن نوراليا!
تبعد مدينة إيلا عن تانجالي حوالي 3 ساعات وتشتهر بكثرة الشلالات فيها. من الأماكن اللي يجب زيارتها في إيلا:
· شلالات روانا
· موقع الجسور التسعة
· مقهى Chill لأكل طيب
خامس مدينة: نوراليا Nuwara Eliya
المبيت: هيريتنس تي فاكتوري Heritance Tea Factory
من أيلا اتجهنا لمدينة نواراليا. بس ملاحظة قبل ما أكمل: ترتفع مدينة نوراليا 1890متر عن سطح البحر اللي ممكن مرات يسبب دوار الارتفاعات. بتقدروا تتجنبوا هذا الاشي بانه كل ساعة على طريقكم إلى نوارا اليا تنزلوا من السيارة 15 دقيقة.
تشتهر نوراليا بجمال طبيعتها وأنها عاصمة الشاي في سريلانكا وهي تقع في وسط الدولة. الفندق اللي بقينا فيه في نوارا اليا اسمه "هيريتنس تي فاكتوري"، وتم بناؤه في القرن التاسع عشر. إذا حضرتوا مسلسل The Crown رح تحسوا حالكم بحلقة مع الملكة اليزابيث. بس رح أترككم مع منظر الفطور بين الهضبات والتلال الخضراء.
ملاحظة بس: الفندق بعيد عن وسط المدينة 45 دقيقة، وبرأيي الشخصي لا تحتاج المنطقة أكثر من يوم.
من الأماكن الجميلة جدا كمان في نوراليا بحيرة جريجوري، وهي بحيرة اصطناعية تم انشائها في العهد البريطاني في سريلانكا. شكل البحيرة مثل بحيرات سويسرا الخلابة المحاطة بالعشب الأخضر والورود الملونة.
بعد ما لفلفنا في بحيرة جريجوري، اتجهنا لمصنع شاي كبير اسمه Labookellie Tea Lounge Damro، وهناك صحت لنا الفرصه انه نذوق الشاي الطازج، ونلَقط من نبتة الشاي، ونتعلم عن مراحل صنع الشاي في سريلانكا، ونشتري من المصنع كمان.
سادس مدينة: كاندي Kandy
المبيت: فندق إيرلز ريجنسي Earl's Regency Hotel
مدينة كاندي هي مدينة في وسط سريلانكا ومحاطة بالجبال الخضراء والأنهار الكبيرة. الفندق اللي نمنا فيه اسمه "إيرلز ريجنت". الفندق جميل لكن المرة الجاي ممكن أحجز Airbnb في نفس المدينة بسعر أقل ومناظر أجمل.
من أجمل الفعاليات اللي ممكن تعملوها في كاندي هي زيارة الحديقة النباتية الملكية. تحتوي الحديقة على 4000 نوع نباتات، وبإمكانك قضاء يوم كامل في الحديقة بدون ملل! إذا انتوا من محبين الأزهار الفريدة والنباتات الغريبة مثلي، بنصحكم تجيبوا معكم الساندويشات والمشروبات وتقضوا يوم كامل هناك، وتعملوا أحلى picnic!
دخولية الحديقة: 1500 روبية سريلانكي
من المطاعم اللذيذة اللي أكلنا فيها في كاندي:
1. بالاجي دوساي Balaji Dosai أكل نباتي طيب جداً.
2. هايداوت لاونج Hideout Lounge أكل طيب وأجواء لطيفة جداً خاصة بالليل.
3. مقهى كانديانا Café Kandyana مقهى صغير وكتكوت، مطل على نهر.
سابع مدينة: قرية كاندالاما Kandalama
المبيت: هيريتانس كاندلاما Heritance Kandalama
كانت الرحلة من كاندي إلى كاندلاما مليئة بالمناظر الساحرة، والبحيرات والأنهار والغابات الكثيفة. كاندلاما قرية صغيرة تحتوي على موقعين يونسكو للتراث العالمي، أولهم معبد دامبولا من القرن الأول قبل الميلاد، والثاني هو صخية سيجيريا من القرن الخامس بعد الميلاد.
الفندق اللي نمنا فيه اسمه هيريتانس كاندلاما Heritance Kandalama، وهو مصمم ليبدو أنه جزء من الطبيعة. هذا الفندق من أكثر الفادق المميزة اللي أقمنا فيها لأنه بيهتم بطريقة غير عادية بالبيئة والحيوانات. وبإمكانكم رؤية القرود في كل صباح في بلكونة الغرفة!
بس ملاحظة: يقع الفندق في منطقة نائية، وهو مميز جداً والمناظر الطبيعية هناك خيالية! ولكن أجواء هذا الفندق مختلفة. لانه موجود في الغابات، فيه بالغرف سحالي على الجدران عن قصد تساعد على قتل الحشرات، فإذا بتخافوا من السحالي، ما بنصح تقيموا في هذا الفندق. لكن إذا ما عندكم مشكلة، الاقامة في الفندق تجربة مميزة جداً!
ثامن مدينة: سيجيريا Sigirya
لعشاق الأماكن التاريخية والتسلق، صخرة سيجيريا أو صخرة الأسد مكان لا يفوّت في سريلانكا. بنى الملك كاشيابا قصره على هذه الصخرة في القرن الخامس، ويوجد فيها مدرجات وبرك مائية ورسومات جدارية ملونة عمرها أكثر من 1500 عام!
من الأشياء اللي ممكن الواحد يعملها هناك تسلق الصخرة، اللي بتاخذ حوالي ساعة للوصول لأعلاها، بس المنظر البانورامي من فوق خيالي، بالأخص انك بتكون أعلى من كل الجبال اللي حواليك فبتحس حالك طاير! إذا بصحلكم الفرصة تكونوا في مناطق قريبة من سيجيريا، ما تفوتوا عليكم هاي الرحلة!
تاسع مدينة: كولمبو Colombo
المبيت: موفمبيك كولومبو Movenpick Colombo
كانت آخر مدينة بنزورها خلال رحلتنا، وزي ما بحكوا: ختامها مسك! أنا شخصياً استمتعت جداً جداً في كولومبو، وحسيت كان لسة ممكن أقعد فيها أكثر من ال 3 أيام! الفندق اللي حجزناه هو الموفمبيك كولومبو، وكان صراحة خيالي، من الغرفة، للبركة الخارجية على الطابق ال24، للفطور الطيب، والخدمة المميزة، فعلاً كان الفندق من أحسن الفنادق اللي أقمنا فيها في سريلانكا.
مثل ما حكيت، كان معانا 3 أيام في العاصمة كولمبو، وفي ال3 أيام زرنا أماكن متعددة وعملنا أشياء رائعة مثل:
1. مساج في أشهر سبا في كولومبو اسمه Spa Ceylon. سعر جلسات المساج معقولة، وتتراوح ما بين 6000 روبية إلى 12000 روبية (20 إلى 40 دولار أمريكي).
2. تناول السلطعون السريلانكي الضخم من مطعم Ministry of Crabالشهير. بدون مبالغة من أطيب الوجبات اللي باكلها في حياتي!
3. شراء اللوحات الفنية من منطقة Green Path، وهي منطقة بجانب حديقة عامة كبيرة، بيتجمع فيها الفنانين وبيرسموا وببيعوا رسماتهم كل يوم!
4. زيارة الأماكن التاريخية والدينية الهندويسة مثل معبد Sri Kailawasanathan الملون وساحة الاستقلال.
5. السهر في مطعم King of the Mambo الواقع بالزبط على شاطئ البحر. الأكل طيب والسعر منطقي وكمان الأجواء حلوة جداً!
6. ركوب التوك توك للتنقل من مكان إلى آخر.
7. تناول الفطور في مطعم Café Kumbuk. التصميم الداخلي والخارجي للمحل كتييييير حلو، والأكل شكله وطعمه لا يوصفوا!
8. تناول طعام سريلانكي من مطعم Sri Vihar الشهير.
9. زيارة مقهى The Gallery Cafe الجميل.
10. التسوق في المحلات الشعبية والمولات التجارية في المنطقة!
كان السفر إلى سريلانكا لا على البال ولا على الخاطر، لكني سعيدة جداً بأن الظروف سمحت إنه نقضي فيها 13 يوم، الرحلة كانت من العمر، والمغامرات اللي عشناها رح اتضل معنا للأبد!
