في عطلة عيد القيامة كان معنا بس 3 أيام نسافر فيهم، فقررنا نحجز تذكرة لرحلة سريعة لأوروبا. في هذه الرحلة زرنا مدينتين: فيننا وبراتيسلافا. هاي المدونة هي دليل سياحي لقضاء يوم (٢٤ ساعة) في مدينة الموسيقى والفن: فيينا. كل عمري بسمع عن جمال فيينا الساحر والأجواء الحلوة في المدينة، ومع اني زرت مدن أخرى نمساوية من قبل لكن جمال فيينا فريد من نوعه. الناس والعمارات والفن والموسيقى والروقان بينقلوك لعالم تاني بخليك تفهم ليش أسمهان وفريد الأطرش وأحمد رامي اختاروا فيينا ليقولوا "ليالي الأنس في فيينا نسيمها من هوا الجنّة، نغم في الجوّ له رنّة سمع لها الطير بكى وغنّى".
أول شي: اللوجستيات
الطيران: طيران Wizz Air من عمان إلى فيينا، سعر التذكرة طلع ١٠٠ يورو، وحجزنا التذاكر قبل بأسبوعين من السفر.
المبيت: شقة من Airbnb. موقع الشقة رائع في وسط المدينة، وكل اشي قريب منه. الشقة مريحة وواسعة لشخصين ونظيفة جداً، وبرجع بحجزها نفسها المرات القادمة!
العملة: يورو
المواصلات: تذكرة مواصلات عمومية ٢٤ ساعة تشمل الباصات والقطارات والترامات، سعرها ٨٫٢٠ يورو. يوجد أوبر وبولت في فيينا، وأيضاً تطبيقات لسكوتر آلي يمكنكم استئجاره من الشارع!
اجرائات الدخول والفحوصات المطلوبة: في الوقت اللي سافرنا فيه ما كنا بحاجة لعمل فحص كورونا لأنه ماخدين ال3 مطاعيم! لكن قبل ما تسافروا لازم تشيكوا الاجرائات المحدثة من موقع IATA لأنه القوانين بتضلها تتغير.
٢٤ ساعة سياحة في فيينا: شو أعمل، وين آكل، وين أروح؟
الفطور وحلوى الكايسرشمارن
بدأنا يومنا بأهم وجبة (مشان اذا ما أكلت منيح بنكد ههه) وهي وجبة الفطور. قبل ما نسافر وأنا عم بدور على أطيب أماكن ناكل فيها Kaiserschmarren طلعتلي مدونة بتحكي انه مطعم 15Süßen Minuten من أطيب ٥ مطاعم في كل فيينا. طبق الKaiserschmarren هو طبق حلو، يشبه طعم البانكيك ويقدم عادة مع صوص التفاح. المكان كان لطيف جداً والكايسرشمارن كتيييير طيب هناك! كميته كبيرة فبتقدروا تتشاركوه مع شخص ثاني!
قصر بيلفيدير Belvedere
بعد الفطور رحنا مشي على قصر بيلفيدير (المطعم بعيد ربع ساعة مشي من القصر). بدأت عميلة بناء القصر عام ١٧١٢ ميلادي، وهو من أشهر المعالم في النمسا.
الدخول لحدائق القصر مجاني، وبامكانكم تتمتعوا بجمال الهندسة الخارجية للقصر والنباتات والتماثيل والشلالات على رواق!
سوق ناشماركت الشعبي Nachmarkt
بعد جولة في حدائق القصر، وأخذ بعص الصور الحلوة (بتقدروا تشوفوهم على انستغرامي)، توجهنا إلى السوق الشعبي: Naschmarkt وهو من أشهر أسواق عطلة نهاية الأسبوع!
هون بتقدروا تلاقوا كل أنواع المطاعم النمساوية والتركية والعربية والأجنبية، بالإضافة إلى سوق السمك ومحلات بيع الخضار والفاكهة والملابس وغيرها! السوق مفتوح كل يوم سبت، وفيه اكتظاظ هائل من سكان المنطقة والسياح، وهو من أكثر الأسواق الحيوية الي بزورها في أوروبا!
المكتبة النمساوية القومية
بعرف ممكن بضحك انه أغلب سفراتي بروح فيها على مكتبات، بس صراحة الموضوع عم بصير شوي هوس عندي كل ما أسافر. في هاي السَفرة بقدر أحكي انه هذه المكتبة في فيينا تفوقت (لهلاء) على كل المكتبات الحلوة اللي زرتها من قبل! سعر الدخولية للمكتبة ٨ يورو، برأيي حرزانة ونص!
تم بناء المكتبة النمساوية القومية في القرن الثامن عشر وتحتوي المكتبة على أكثر من ٢٠٠،٠٠٠ كتاب.
هاي المكتبة بتذكرني بمدرسة هوجوارتز في هاري بوتر! شوفوا على التيكتوك تبعي: مكتبات في العالم تشبه هوجوارتز في هاري بوتر.
ثاني حلوى لليوم: Sachertorte
بعيداً عن المكتبة بس ببضعة دقائق، موجود فندق ومقهى Sacher اللي يُحكى أنه مكان ولادة الحلوى النمساوية الوطنية: Sachertorte (زاخر تورتيه). القصة بتقول انه عام ١٨٣٢، طلب الأمير حلوى مميزة لحفلة في القصر، لكن الطباخ كان مريض، فوقعت المسؤولية على عاتق المتدرب في المطبخ اللي كان عمره بس ١٦ سنة.
وقد ما طلعت الكعكة اللي اخترعها زاكية صارت من أشهر الحلويات في النمسا. الكيكة تتكون من طبقتين من كيكة الشوكلاتة، وبيناتهم طبقة من مربى المشمش، وكلها مغطاة بطبقة شوكلاتة داكنة. هل الكعكة أطيب كعكة شوكلاته باكلها؟ لا، لكن هل تجربة تذوق الكعكة هاي في مكان موطئها مع نفس طريقة التحضير قبل حوالى ٢٠٠ سنة حرزانة؟ بالنسبة الي: نعم!
التسوق في ساحة "ستيفان بلاتز" Stephanplatz
بعدما أكلنا ثاني حلوى لليوم، كان لازم نهضِّم ونتمشى. يعد شتيفانبلاتز من أشهر الساحات في مدينة فيينا. هون بتقدروا تلاقوا كل الماركات العالمية للتسوق، بالإضافة للمطاعم والمقاهي الكثيرة. وفي الميدان توجد كتدرائية سانت ستيفان، اللي عمرها أكثر من ٧٠٠ عام. البنايات في فيينا عريقة والفن المعماري رهيب جداً!
وانتوا عم تتمشوا بشوارع فيينا تذكروا تتفرجوا على إشارات مرور المشاة لأنهم غير عن أي إشارات احنا متعودين عليها!
حفل موسيقي من العمر
لما حكت أسمهان "ليالي الأُنس في فيينا"، بعتقد كان قصدها عن كل الحفلات الموسيقية والراقصة اللي بتصير في هاي المدينة الجميلة. هاي المدينة مش بس شهدت عظماء موسيقيين مثل موتزارت وبيتهوفن وشتراوس، لكنها لهلاء بتعيد إحياء هاي العراقة الموسيقية كل يوم. كمية الحفلات الموسيقية اللي بتقدروا تحضروها في فيينا لا تعد ولا تحصى.
بالليل بنصحكم تحجزوا كونسيرت في دار الاوبرا، أو كتدرائيات المدينة. احنا حجزنا كونسيرت لأعمال موتزارت وشتراوس في Musikverein. بس ملاحظة: مقاعد التذاكر اللي ب٥٥ يورو في هذه القاعة ما بتقدروا تشوفوا منها كل المسرح!
العشاء
وصلنا لآخر جزء من هذا اليوم وهو وجبة العشاء. بعد بحث مطول عن أطيب مطاعم بتعمل أكل نمساوي طلعلنا مطعم Zwölf Apostelkeller. كان المطعم معجوق (هذا معياري للمطاعم الزاكية) وأهم اشي انه كان مفتوح لساعة متأخرة بمعيار أوروبا (وصلنا عليه ١١ بالليل). الأكل النمساوي مثل الأكل الألماني الاثنين بتميزوا بنفس الأطباق:
الفيينيز شنيتزل: ستيك لحم خاروف أو دجاج أو خنزير مغطى بطبقة breadcrumbs ومقلي.
سلطة البطاطا: مفهومة على ما أعتقد.
الفورست: نقانق هوت دوج تباع عادة في كشك في الشارع.
حساء البيف غولاش: يخنة ساخنة فيها لحمة، ومشهورة مش بس في النمسا لكن كمان في كل الدول المحيطة بالنمسا.
طلبنا هون شنيتزل بلحم الخاروف وكان طيب جداً. اللحمة طرية، والكراست مقرمش، وأجواء المطعم لزيزة، والبناية عمرها أكثر من ألف سنة!
بعد هذا اليوم الحافل توجهنا للشقة تبعتنا لننام ونرتاح بعد كل هاي اللفلفة، ومشان بكرة عندنا يوم تاني حافل في براتيسلافا، فترقبوا مدونة براتيسلافا قريباً جداً!