من فترة عمالها تصدف أنه سفراتي بكونوا بفصل الشتاء، وبدت هاي السلافة السنة الماضية ومن وقتها بطّل عندي أي مانع أسافر في فصل الشتاء، بالعكس صرت أفضل السفر في الشتاء بدل الصيف.
أول سفرة بالشتاء كانت إلى كوبنهاجن، وكانت في شهر يناير، والحرارة كانت -7 درجة سيلسيوس. وبعدها كانت لأيسلاندا وكانت الدنيا بتثلج، ومع هيك كانوا من أحلى السفرات في حياتي. بعد هذه التجارب صرت أحجز عطلي في فصل الشتاء. وهلا بدي أحكيلكم ليش كتيييير حلو السفر في الشتاء!
6 أسباب للسفر بالشتاء
1. كل اشي بكون سعره أرخص
من سعر الإقامة لأسعار تذاكر الطيران، كل شيء سعره أرخص في فصل الشتاء لأنه low season.. حتى المواصلات من مدينة لأخرى بتكون نصف السعر إذا مش أقل كمان!
2. ما في ازدحام خانق من السياح
لأنه low season، ما بكون في ازدحام خانق من السياح في المدينة وما بكون في خطوط انتظار طويلة للمتاحف والمطاعم. وبتقدروا تشوفوا المدينة أكثر على حقيقتها مليانة بسكانها المحليين وليس سائحين أجانب.
3. المناظر خرافيييييية
بحيرات مجمدة، ومدن وجبال مغطاة بالثلج.. من أحلى المناظر اللي ممكن تشوفوها. طبعاً مش كل المدن أصلا بكون فيها ثلج، ولا كل المدن بتكون غائمة وفي بتكون الحرارة تحت الصفر لكن الشمس طالعة. هذا المزيج بيخلق scenery خلاب بضيف على جمال المدينة نفسها.
4. الطرق والمواصلات مهيئة لجميع الظروف الجوية
الطرق والمواصلات العامة والبنية التحتية مهيئة لجميع الظروف الجوية. يعني كل المواصلات شغالة طبيعي، والطرق آمنة للسواقة (إلا إذا تم التنبيه من قبل سلطات الدولة أو فرض حظر تجول). اقرأوا عن السواقة في المدينة التي تريدون الذهاب إليها على الانترنت لمعرفة المزيد من المعلومات عن الطرق. أنا وصديقاتي استأجرنا سيارة في آيسلاندا وسقنا في الثلج وكانت الطرق آمنة جداً.
5. السياحة الشتوية غير
مثل ما البحر للصيف، والبركة للشوب، في كتييييييييييير من الأشياء اللي ممكن تعملوها أو تشوفوها لعطلتكم الشتوية وما بينفع تنعمل بالصيف. منها الذهاب إلى بحيرات طبيعية ساخنة ورؤية الشفق القطبي (Aurora) والتزلج وغيرها.
6. المباني دافئة جداً
مع أنه ممكن الدنيا تكون كتير برد في الخارج، لكن في الداخل البيوت والفنادق والمطاعم والبنايات كلها مدفأة كثيراً لدرجة انه ممكن تلبس tshirt في الداخل. فما تفكر انه رح تكون بردان ومسموم بدنك كل الوقت، البرد محتمل إذا كنت مجهز حالك من قبل!
شو الأشياء اللي يجب أن آخذها معي لما أسافر في الشتاء؟
- ملابس عازلة للحرارة Thermal Clothing
أو
- ملابس داخلية سميكة (كولون صوف وفانيلا كم طويل)
- جوارب سميكة
- كندرة أو بسطار عازل للماء Waterproof Boots
- جاكيت عازل للماء (والهواء إن تواجد)
- شال أو لفحة خميلة
- طاقية صوف وغطاء للأذنين
- شمسية
- غطاء عازل للموبايل إذا كتير بتحب تصور
وهيك بتكونوا جاهزين لرحلة شتوية ممتعة ومختلفة من نوعها!
إذا عندكم أي سؤال عن السفر بالشتاء أنا ما جاوبته، أكتبولي كومنت!