السياحة في جورجيا: دليل قضاء أسبوع في جورجيا

آخر سفرة لسنة ٢٠٢٢ ما كنا مخططين وين نروح، وبصراحة، تأخرنا لحتى ما فكرنا انه نحجز رحلة. ومثل ما بتعرفوا، شهر ديسمبر بكون عجقة، ومعظم السفارات مافيها مواعيد، والتذاكر للدول المشهورة بسياحة الكريسماس أسعارها في العلالي. وبينما إحنا بندور على بلد جديد نستكشفه، فجأة زوجي تذكر إنه جورجيا ما بتحتاج فيزا (تأشيرة)! عنجد جورجيا؟ طيب شو بدنا نعمل في جورجيا؟ انا ما بعرف أي حدا زارهذه البلد في فصل الشتاء.. يا ترى شو المدن اللي ممكن نزورها؟ وشو النشاطات وطبيعة الأكل هناك؟

مشان هيك عم بكتب هذه المدونة، اعتبروها دليلكم لقضاء أسبوع كامل خرافي في جورجيا وفي أي طقس، وبالأخص في فصل الشتاء!

بس أول اشي اللوجستيات

التأشيرة: كثير من الجنسيات العربية لا تحتاج لتأشيرة لدخول جورجيا ومنها الجنسية الأردنية.

الطيران: يوجد طيران مباشر من عمّان إلى تبليسي عاصمة جورجيا على متن الأردنية للطيران. الرحلة مدتها ساعتان ونصف. بتقدروا تحجزوا التذكرة من شركات السياحة والسفر، أو مباشرة من خلالهم.

العملة: العملة في جورجيا هي اللاري الجورجي. في الوقت اللي كنا فيه في جورجيا، كان ال١٠٠ لاري يعادل ٢٦ دينار أردني أو ٣٧ دولار أمريكي. العملة كانت تزيد وتنقص بشكل واضح واحنا هناك، وقال لنا الدليل السياحي أنه سعر اللاري بينخفض في موسم الصيف بسبب كثرة السياح وتحسن الاقتصاد.. ما بعرف قديش ممكن يكون الفرق ملحوظ بس هيك السيستم. بالنسبة للأسعار، كنا ماخدين انطباع قبل ما نسافر إنها رخيصة جداً، لكن حسينا الأسعار مثل الأردن!

شريحة الهاتف SIM Card: اشتريت شريحة من المطار من شركة اتصالات اسمها Magti. الانترنت ما قطع ولا مرة والسرعة كانت ممتازة. نصيحة: إذا قررتوا تشتروا خط، اشتروه مع مكالمات داخلية مشان تقدروا تحكوا مع المطاعم للحجوزات، أو مع سائقين السيارات.

المواصلات: المواصلات سهلة جداً في تبليسي. بإمكانكم تحميل تطبيق Bolt للتنقل داخل المدينة، وأسعاره مثل أسعار تطبيقات التنقل في الأردن.. يعني رخيصة بالنسبة لأوروبا وبلدان غربية. أما بالنسبة للتنقل بين المدن، قمنا باستئجار دليل سياحي من شركة Travel Team Georgia لمدة ٤ أيام، وأخذنا على الأماكن اللي كنا مختارينها من قبل، وكمان اقترح أماكن جديدة النا.

الأماكن السياحية: جورجيا فيها مدن كثيرة وبعيدة عن بعض، فإذا بدكم تلفوها كلها، رح تحتاجوا ٣ أسابيع على الأقل لتخلصوها. في هاي الرحلة كان معنا ٨ أيام، وما كان بدنا نقضي كل الرحلة بنتنقل في السيارة، مشان هيك:

أفضل دليل سياحي لقضاء أسبوع في جورجيا

اليوم الأول: تبليسي

وصلت الطيارة على الساعة ٦ ونصف مساءاً في توقيت تبليسي

المبيت: كالعادة استأجرنا شقة على النهر من Airbnb. تصميم الشقة بياخذ العقل، والموقع قريب جداً من أغلب الأماكن السياحية، كنا نمشي لأغلب المحلات والنشاطات والمطاعم! بس ملاحظة عن الشقة: الشقة في الطابق الثالث وما في مصعد في العمارة، فإذا ناويين تستأجروها، حطوا هذا الموضوع في عين الاعتبار! غير هيك، الشقة موديرن جداً جداً، وأرضية الحمام مدفية وفيها بلكونة مطلة على النهر!

النشاطات: أول ليلة كنا تعبانين وبس طلعنا تمشينا في المنطقة شوي، وأكلنا في مطعم اسمه Nina’s Garden.

اليوم الثاني: تبليسي

يا صباح القهوة

ابتدأنا يومنا بالقهوة… وما أدراكم ما هي القهوة! القهوة هي فن في جورجيا و٩٠٪ من المقاهي اللي زرناها (حتى لو كانت في كازية صغيرة في العراء) كانت قهوتهم مميزة جداً. أول مقهى زرناه هذه الرحلة اسمه: Erti Kava، والمقهى كان يعم في السكان المحليين اللي بشتغلوا وبدرسوا، أو بس جايين يشربوا كاسة قهوة لذيذة! المقهى بقدم فطور وسلطات.. وطبعاً قهوة طيبة!

سوق الشارع Street Market

تتميز تبليسي في تعدد الأسواق وتنوعها، فبتقدروا تشتروا من أسواق ماركات عالمية وأسواق تصفية وبازارات محلية وماركات جورجية صغيرة! هذا السوق موجود في منطقة Rustaveli Avenue اللي تعتبر منطقة التسوق للماركات العالمية. بس اللي بميز ال street market انه المنتجات أغلبها مصنوعة باليد من سكان محليين!

سوق الورد في Orbeliani Square

ما بعتقد بده شرح كثير، سوق الورد موجود بالقرب من الكثير من المعالم السياحية في تبليسي، وبتقدروا تمروا منه في طريقكم لهذه المعالم! السوق مليء بالأزهار الجميلة والملونة ومحلات النباتات والأشجار. ومشان رحنا في موسم عيد الميلاد المجيد، كانوا التجار ببيعوا شجر كريسماس كمان!

بازار Orbeliani

بازار داخلي جديد في المدينة. بتقدروا تلاقوا فيه مطاعم ومقاهي ومحلات أجبان ومخابز!

برج الساعة Clock Tower

واحد من أشهر المعالم في تبليسي. تم بناء برج الساعة عام ٢٠١٠، والمبنى غريب جداً بحيث انه مائل. كل ساعة، يخرج تمثال ملاك من برج الساعة وبدقها. إذا بتقدروا تزوروا الساعة وقت هذا العرض بكون روعة!

جسر السلام Bridge of Peace

جسر ذو تصميم جميل وحديث، ويربط المدينة القديمة بRyke Park. المنظر من الجسر جميل جداً بحيث يطل على قلاع وكنائس مشهورة، بالإضافة إلى العاصمة من نهر كورا.

الغذاء ١: Linville

هلاء خلينا نحكي بالمهم.. الأكل في جورجيا كان من ممتاز إلى ممتاز جدا! قبل ما أدخل في تفاصيل المطاعم والأكل اللي أكلناه، بحب أوضح انه في أكل نباتي وبحري (حلال) بكثرة في المطاعم، ونوع الوجبات بشبه الأكلات في الوطن العربي، مثل: اليخنات، والمعجنات، والمناقيش، وحتى الأجبان.

أول مطعم زرناه اسمه Cafe Linville. الشيء اللي لاحظناه في المدينة هو التنوع والتفرد في التصميم الداخلي لكل مطعم. ما كان في ولا محل دخلناه بشبه اللي قبله، ولا حتى الفنادق. تصاميم المحلات جداً unique لدرجة انه بتحس انه كل محل متحف بنفسه. والجميل أن العمارات قديمة جداً والتصاميم لا تمحي الطابع القديم، لكن تعززه بلوحات عصرية وأثاث ملون ولمسات غريبة لكن جميلة!

في هذا المطعم، اكتفينا بطلب تشكيلة أجبان محلية مع خبز. زرنا Linville لأنه كان عندنا فضول نشوف تصميم المطعم والقعدة، وبالفعل it did not disappoint!

الغذاء ٢: Cafe Daphna

مطعم Cafe Daphna بعيد ٩ دقائق مشياً على الأقدام من المطعم اللي قبله، ومشهور بأنه ببيع أطيب خنكالي في تبليسي. قي هاي الرحلة، جربنا خنكالي كثير وفعلاً كان Cafe Daphna من أطيبهم. أكلة الخنكالي Khinkali هي عبارة عن عجينة محشية لحمة أو جبنة أو فطر.

اللقيمات هاي بتكون يا اما مسلوقة، يا مقلية، والنوعين أطيب من بعض. هون جربنا من كل اشي، وكل اشي كان زاكي كتير وبالأخص الجبنة. تخيلوا معي عجينة، وفي داخلها نوعان جبنة، وبتطلع ساخنة والطقس بارد.. وغير هيك يتم تقديمها مع زبدة ذائبة… دمار شامل!

دار الأوبرا والباليه في تبليسي

الموسيقى هي جزء لا يتجزأ من الحضارة الجورجية. توقعوا دائماً انكم تسمعوا ناس بيتدربوا على آلاتهم العزف وانتوا بتمشوا في الشارع، أو تحضروا كونسرت مجاني في حدائق المدينة. نفس الاشي بعود للأوبرا والباليه والمسرح في جميع المدن في جورجيا. حضرنا الأوبرا الشهيرة La Boheme في دار الأوبرا والباليه تبليسي.

المبنى مبهر من الداخل، والعرض كان ممتع جداً مع وجود ترجمة للانجليزي. سعر التذاكر مناسب جداً بالمقارنة مع الدول الأوروبية، فتذكرة واحدة لكراسي قريبين جداً من المسرح، كانت تعادل ال٣٠ دولار أمريكي.

العشاء: Stamba

أطيب خاتشابوري بناكله في جورجيا كلها كان في Cafe Stamba! الجبنة اللي بستخدموها لهذا النوع من المعجنات، بشبه جبنة العكاوي مع موزريلا والطعم ١٠/١٠. المطعم موجود داخل فندق ستامبا ودائما مليان. إذا بدكم تروحوا عليه بنصحكم تحجزوا طاولة قبل بيوم!

احضروا فيديو: تعالوا معي جولة في تبليسي: اليوم الأول!

اليوم الثالث: رحلة لثلاثة مدن

في هذه الرحلة، وبعد بحث حثيث، قررنا انه ما نستأجر سيارة ونسوق لحالنا. مشان هيك لما وصلنا، أخذنا دليل سياحي لمدة ٤ أيام عشان يلفلفنا في المدن اللي كنا حابين نشوفها. أول جولة كانت من تبليسي لثلاث مدن: Mtskheta، Gori, Uplistsikhe

متسخيتا Mtskheta

كانت عاصمة جورجيا قديماً وتعتبر من أقدم المدن المأهولة بالسكان في العالم! المدينة صغيرة وجميلة، وتبعد المدينة ٢٠ دقيقة من تبليسي. أخذا الدليل إلى كتدرائية سفيتيخوفيلي Svetitskhoveli Cathedral (شاطرين والفظوها صح ههه). الكتدرائية ضخمة وجميلة ومحاطة بالأكشاك الي بتبيع منتجات محلية للسواح في المدينة. ويقال بحسب التاريخ الجورجي، بأن شخصا يدعى الياس، كانا موجودا في أوروشليم وقت صلب السيد المسيح، فأخذ قميصه إلى جورجيا. والقميص الآن محتفظ به تحت الكتدرائية.

غوري Gori

تبعد غوري عن متسخيتا حوالي ساعة. في الطريق وقفنا وأكلنا معجنات لحمة وجبنة وبيض من كشك صغير على الشارع.

غوري مدينة مافيها اشي كثير، غير انها موطئ رأس جوزيف ستلين وفيها متحف عنه. بالإضافه انه بيته وقطاره الأصليين لسة موجودين. المدينة برأيي كئيبة واضطرينا نمر فيها عشان نوصل المدينة اللي بعدها.

أبليستسيخ Uplistsikhe

تبعد مدينة أبليستسيخ ٢٠ دقيقة عن مدينة غوري. تعود المدينة للقرن الثاني قبل الميلاد وهي مدينة محفورة كاملاً بالصخر. في القِدَم، كان يسكن المدينة ٢٠ ألف شخص، ويقال أن الملكة تمار (ملكة جورجيا) كانت وحدة منهم! المنظر من الجبل جميل بحيث يطل على النهر والأراضي الخصبة. المدينة تحتاج لساعة علشان تشوفوها، وبنصح بزيارتها مع دليل سياحي، عشان مافي كثير قارمات بتشرح عن المدينة الأثرية.

بعد اللفلفة بين المدن الأثرية، رجعنا على تبليسي وضبينا أغراضنا لأنه الأيام الجاي رح نقضيها في مدن ثانية في جورجيا!

اليوم الرابع (ونصف الخامس): كازبيجي

إذا بتسألوني شو أحلى جزء من سفرتك لجورجيا، بقوللكم، من دون منازع: كازبيجي. كازبيجي هي مدينة تبعد ١٥٣ كم (حوالى ٣ ساعات) من تبليسي، وممكن الواحد يروحها يوم واحد فقط. لكن إذا جد بدكم تتمتعوا بجمالها وكل النشاطات اللي بتوفرها، لازم تقعدوا يومين أو ثلاثة. تقع كازبيجي في جبال القوقاز العظيمة، وتتميز في الثلوج الغزيرة في فصل الشتاء وكونها قريبة جدا من مدينة غودوري اللي هي منطقة منتجعات للتزلج على الثلج في جورجيا. بالإضافة لذلك، جبال كازبيجي خضراء وجميلة جداً في فصل الصيف وبتقدروا تعملوا فيها تخييم و hiking.

نصيحة للأشخاص اللي عندهم داء المرتفعات أو داء الحركة: خذوا معكم أدوية عشان ما يصيبكم غثيان، لأن الجبال مرتفعة جداً، والطريق بتلف مثل الدائرة من جبل إلى جبل. في حال نسيتوا الدواء من الدولة اللي قادمين منها، بتقدروا تشتروا من صيدليات في جورجيا وتاخذوه قبل ما تطلعوا من تبليسي.

أول محطة: سد جينفالي Zhinvali

الشيء الجميل في الطريق من تبليسي إلى كازبيجي هي وجود ٣ محطات خلابة، ابتداءاً من سد جينفالي. هذا السد كبير جداً وفي استراحة صغيرة على الطريق ونقطة تصوير بإمكانكم زيارتها قبل إكمال رحلتكم. الاستراحة تضم أكشاك سياحية صغيرة، يتم فيها بيع منتجات محلية وطعام محلي.

ثاني محطة: قلعة أنانوري Ananuri Fortress

هي قلعة رائعة الجمال، تم بنائها في القرن الثالث عشر وتطل على نهر أراغفي. تضم القلعة كنيستين، وبرج الجرس وتعد من أكثر المعالم شهرة في جورجيا.

ثالث محطة: مدينة غودوري Gudauri

المدينة مشهورة في موسم التزلج على الثلج، وفيها أشهر منتجعات التزلج في كل جورجيا. لما رحنا في شهر ديسمبر، كان الثلج خفيف وما كانوا مفتتحين موسم التزلج. الموسم عادة ببدأ في شهر يناير أو فبراير، لكن بتغير كل سنة. منطقة غودوري على ارتفاع ٢٠٩٦ متر، فاللي عنده داء المرتفعات Altitude Sickness يفضل ياخد دواء في أول النهار.

بعد ما وقفنا شوي في المدينة عشان نشوف تلفريك التزلج، عدنا للسيارة وتوجهنا لمدينة كازبيجي التي تبعد ٥٠ دقيقة عن غودوري.

مدينة كازبيجي Kazbegi

المبيت: فندق Rooms Kazbegi

من أجمل الفنادق اللي بقيم فيها في حياتي: Rooms Hotel Kazbegi. أخذنا الغرفة المطلة على الجبل Mountain View والمنظر كان خيالي. الفندق عبارة عن منتجع وفيه Spa وبركة داخلية مدفية وجاكوزي خارجي وساونا وقاعة رياضة صغير، بالإضافة إلى مطعم ومقهى. الطعام في الفندق كان ١٠/١٠ وأكلنا جميع وجباتنا فيه.

المدينة صغيرة جداً وأغلب الأشخاص اللي بزوروها، بزوروها مشان الراحة والاستجمام في الفنادق، أو التزلج. وبما أنه ما كان في موسم تزلج، قررنا نقعد نسترخي في الفندق!

طاقم الفندق لطيف جداً ومددوا لنا موعد الخروج من الفندق عشان نقدر نقعد فيه وقت زيادة. الصدمة كانت في اليوم الثاني، لما صحينا على صوت النزلاء، وفتحنا الشباك لنلاقي كل المدينة مغطية بالثلوج الكثيفة. المنظر لا يضاهى اي منظر، وفرحتنا كانت مثل الأولاد الصغار.

الفندق بقدم حرامات مشان تتدفوا فيها لما تطلعوا تلعبوا بالثلج، وكل الناس كانوا برموا ثلج على بعض، أو بتصوروا، أو قاعدين في الجاكوزي اللي درجة حرارته ٤٠ درجة سلسيوس بينما الدنيا عم بتثلج!

إذا ناويين تزوروا كازبيجي في فصل الشتاء، فبنصح بشدة انكم تحجزوا في فندق Rooms Kazbegi.

اليوم الخامس والسادس: كازبيجي وكاخيتي

الرحلة من كازبيجي إلى كاخيتي بتاخذ تقريباً ٣ ساعات ونصف (حسب الأزمة والظروف الجوية).

تتميز مدينة كاخيتي بالطبيعة الخلابة وكروم العنب والزهور الجميلة. مع أنه الخريف من أفضل المواسم لزيارة المدينة بسبب موسم حصاد العنب، وألوان الأشجار الخرافية، لكن حتى في فصل الشتاء كانت جميلة. المدينة صغيرة جداً وهادئة وبعيدة عن ضجة العاصمة. في خيارات مبيت رائعة في كاخيتي منها منتجعات كبيرة مطلة على بحيرات وحتى فنادق صغيرة مع كروم عنب تديرها عائلات جورجية. هذه المدينة مشهورة بصناعة النبيذ ويمكنكم زيارة كروم مشهورة كثيراً في المنطقة.

المبيت: فندق راديسون تسيناندالي The Tsinandali Estate, A Radisson Collection Hotel

فندق الراديسون تسيناندالي، أيضاً كان من الفنادق الخلابة اللي زرناها في جورجيا. يحتوي الفندق على ملاعب ومنتجع فيه بركة مدفاة داخلية وجاكوزي، بالإضافة إلى بركة مدفاة على الطابق الخامس، مطلة على جبال القوقاز.

الطعام طيب في الفندق وموجود ٥ مطاعم ومقاهي ممكن تاكلوا وتشربوا فيهم! طاقم الفندق لطيف جداً وأعطانا upgrade على غرفتنا وكمان قبلوا انه يأخرولنا موعد الخروج من الفندق.

الحلو بالفندق أنه بضم كروم عنب خاصة به، وكمان قريب من متحف منزل ألكساندر تشافشافادزه. مثل ما حكيت، المنطقة هادئة جداً ومريحة للعين، وتجبرك على أخذ يومين من الراحة بعيداً عن صخب العالم.

بعد قضاء يومين في كاخيتي الجميلة، توجهنا لتبليسي التي تبعد فقط ساعتان ونصف.

العشاء في تبليسي: Keto and Kote

اليوم السابع: تبليسي

الفطور: Cafe Chaduna

بدأنا يومنا بأهم وجبة في اليوم: الفطور! مثل ما قلتلكم من قبل، التصميم الداخلي في المطاعم والمقاهي والمحلات في تبليسي مميز جداً وCafe Chaduna من أكبر الأمثلة على ذلك (بتقدروا تشوفوا في الصور).

المنيو صغير في المطعم وموجود عندهم بضعة أصناف لفطور تقليدي في جورجيا، مثل أكلة تشبه الشكشوكة في الطعم والمقادير. المطعم كتكوت والأكل طيب.. بنصح فيه!

المحطة الثانية: Gallery 27

إذا عمركم عملتوا بحث عن جورجيا في جوجل فأكيد شفتوا صورة البناية القديمة ودرج البناية المبهر. يقع المبنى في المدينة القديمة في تبليسي ويوجد فيه معرض للمشغولات اليدوية. درج المبنى مغطى في بالزجاج الملون الذي يدخل أشعة الشمس في طريقة دراماتيكية للداخل، وهو مكان جميل جداً للتصوير.

المحطة الثالثة: Mother of Georgia

تمثال أم الجورجيين هو من المواقع المشهورة جداً في تبليسي وتم بناؤه عام ١٩٥٨ وهو العام اللي احتفلت فيه جورجيا في عيدها ال١٥٠٠.

يوجد طريقتين للوصول لهذا التمثال: المشي على الأقدام أو التيليفريك. نصيحتي هي أخذ التليفريك عند الصعود للتمثال لكن المشي في الرجعة، لأن المناظر خلابة والتمشي بين البيوت في المدينة القديمة له رونقه الخاص.

المحطة الرابعة: Fabrika

مجمع فابريكا كان مصنع خياطة في العهد السوفييتي في جورجيا وتم الآن تحويله لمبنى متعدد الاستخدامات. بتقدروا في نفس المجمع تلاقوا هوستيل، ومطاعم، ومحلات سيراميك، ومتاجر ملابس، وحلاقين، ومقاهي وغيرها! المكان مليء بالhipsters وجيل الشباب، وممتع جداً الجلوس هناك وتأمل الfashion styles للأشخاص اللي بلفلفوا في Fabrika.

المحطة الخامسة: جولة القهوة

من الأشياء اللي بحب أعملها لما أسافر هو الذهاب في جولة مشي مع دليل سياحي مجاني في المدن الجديدة اللي بزورها. لكن هذه المرة وجدت أن هناك شخص يقدم جولة لخمس مقاهي في تبليسي، فحجزنا معه! المقاهي ليست عادية، ففي منها برسموك على الكاسة، ومنها مطل على كل المدينة من فوق، ومنها يقع على النهر مباشرة. الجولة ممتعة جداً والدليل شخص لطيف، من سكان المنطقة، وبحكي انجليزي منيح!

العشاء: Zodiaqo

بعد جولة البحث المطولة عن أطيب خنكالي، تم الاقتراح لنا إنه نجرب مطعم Zodiaqo.

المطعم يقدم خنكالي مقلي وطعمه كان يشبه السمبوسك: عجينة مقلية، محشية لحمة وبقدونس واو!! الطعام كان شهي وختمنا رحلتنا بوجبة ممتازة ١٠/١٠ في جورجيا!

احضروا فيديو: تعالوا معي جولة في تبليسي: اليوم الثاني!

بس أحكي انه جورجيا فاقت كل توقعاتنا وعنجد كان ختام هذه السنة مسك في جورجيا. شفنا مناظر ولا عمرنا شفناها، وأكلنا أكل ولا عمرنا ذقناه من قبل!

اقرأوا آخر مدوناتي:

أفضل برنامج سياحي لقضاء ٢٤ ساعة في فيينا

أكثر من ٥٠ مطعم للفطور في عمّان