• دُلي

5 أشياء يمكن رؤيتها مجاناً في مدريد!

تم التحديث: 1 أغسطس 2018


مدريد 100% واحدة من المدن المفضلة لدي، مش مشان فيها طبيعة حلوة أو بحر أو خضار (لأنه تقريبا ما فيها).. لكن مدريد مدينة كتيييييير عجقة وفي مليون اشي الواحد يعمله فيها والناس دايما طالعين ومبسوطين وبلفلفوا! واحدة من الأشياء اللي لفتت انتباهي بمدريد (وهذا اشي ما شفته بكتير بلاد أوروبية) أنه في كتير أشياء ممكن تعملها أو تشوفها ببلاش هناك!


هاي المدونة رح تكون عن هذا الموضوع! كملوا قراءة عشان تعرفوا...


5 أشياء يمكن رؤيتها مجاناً بمدريد


1 رتيرو بارك El Retiro Park

أول شيء ممكن تشوفه ببلاش هو حديقة رتيرو أوEl Retiro Park في مدريد. اللي يميز هذا الحديقة هو انه مساحتها 125 هكتار وفي جواتها قصر وحدائق ورود متعددة وتماثيل وبحيرة اصطناعية ممكن تركب فيها قارب. مشان هيك ضب أكلك في سلة وروح عالحديقة أقعد قدام البحيرة على الحشيش واسمع لأصوات المغنيين اللي بيجوا بغنوا ببلاش مشان يسلوا الناس (طبعا ما تنسى تعطيهم من الفرايط اللي معاك تقديرا لأتعابهم).



2 القصر الكرستالي في رتيرو بارك Palacio de Cristal

واحد من أجمل الأشياء اللي بشوفها بحياتي! القصر موجود في رتيرو بارك وبتدخل عليه مجاناً. ممكن يكون في دور لكن كتيير محرز انك تشوفه من جوى!



3 القصر الملكي Royal Palace of Madrid

القصر الملكي في مدريد فيه ساعات محددة خلال الأسبوع يكون الدخول فيه مجاناً. طبعاً لازم تيجي قبل بوقت مشان كل السياح بكونوا واقفين خط ينتظروا! التذكرة في الأيام العادية سعرها 10 يورو.


4 متحف ديل برادو Museo Del Prado

متحف فني خرااافي تم بناءه في 1819 ويحتوي على أكثر من 7000 لوحة فنية لفنانين مشهورين جداً مثل غويا Goya وهيرونيموس بوس Hieronymus Bosch. مثل القصر الملكي، في ساعات معينة خلال الأسبوع يمكن فيها زيارة المتحف ببلاش. بس انتبهوا! خط الدور طويل جدااااا ولازم تروحوا قبل بساعة على الأقل من الساعات المجانية لتقدروا تدخلوا عالمتحف. مشان هيك خذوا معكم شيء يسليكم أو تسلوا مع الناس اللي واقفين بالدور! سعر التذكرة الأصلي 15 يورو.



5 بانوراما في إل كورتيه انجليز El Corte Ingles

إذا بتحبوا مناظر البانوراما، ما الكم إلا إل كورتيه انجليز. إل كورتيه انجليز هو عبارة عن مول كتير مرتب فيه ممكن تلاقوا كل اشي بدكم اياه. مشان تشوفوا المنظر المطل على أشهر شارع في مدريد وهو الغران فيا Gran Via بس اطلعوا على آخر طابق بالكورتيه انجليز وتمتعوا بمناظر المدينة المعجوقة! نصيحتي تروحوا باليل وتاخذوا طاولة جنب الview وتشربولكم شيء بارد أو سخن (على ذوقكم)!



طبعاً دائما الشوارع والساحات في مدريد مليئة بالناس والفنانين street performers and artists ومستحيل تزهق وانت بتلفلف هناك!


اذا عندك أي اقتراحات أخرى اكتبولي كومنت! انشالله يكون عجبكم! سفر ممتع :)

127 عرض0 تعليق