التخطيط الذكي هو سر كل رحلة موفقة وممتعة. وهذا بالضبط السبب اللي خلاني أكتب هذه المدونة. فيها رح تلاقوا مخطط لأربع أيام في بودابست، شامل الأماكن السياحية والأماكن الترفيهية والمطاعم اللي ممكن تزوروها خلال فترة 4 أيام!
4 أيام في بودابست: شو أعمل، ووين أنام، وشو آكل؟
بس أول شي: شوية لوجستيات
الفيزا لهنجاريا
بودابست هي دولة من دول الشنجن ويجب الحصول على تأشيرة شنجن لدخولها.
العملة في هنجاريا
العملة في بودابست هي الفورنت المجري أو Hungarian Forint. أسهل طريقة لحفظ معادلة التحويل (على الأقل لإلي) هي أنه كل 1000 فورنت = 3 يورو تقريباً أو 2.5 دينار أردني (*طبعاً بتفرق 2 يورو ممكن إذا الرقم كبير لأنه هاي المعادلة تقريبية).
يعني (المبلغ بالفورنت/1000)*3 = المبلغ التقريبي باليورو
2000 فورنت = 6 يورو (الرقم الدقيق هو6,60 يورو)
12000 فورنت = 36 يورو (الرقم الدقيق هو 36.8 يورو)
وهيك!
المواصلات في بودابست
المواصلات سهلة جداً في بودابست وفي تكاسي وباصات وtrams كل مكان. تطبيق الuber ممنوع في البلد لكن يوجد تطبيق تكسي اسمه FoTaxi يمكن الحجز من خلاله. أسعار التكاسي رخيصة بالنسبة لأوروبا، يعني رحلة مدتها 10-15 دقيقة تكلف 2000 فورنت مجري (تقريباً 5 دينار أردني). الرحلة من المطار لوسط المدينة تكلف تقريباً 7000 فورنت مجري (تقريباً 18 دينار أردني) ومدة الرحلة 30 دقيقة. يمكن أيضاً أخذ باص المطار الذي يكلف 900 فورنت (ديناران ونصف تقريباً).
النومة
كالعادة نمنا بشقة من Airbnb. الشقة كانت فخمة جداً وبالضبط في وسط المدينة مما اختصر علينا الكثير من تكاليف المواصلات. والشارع اللي نمنا فيه هو شارع التسوق وفيه كل المطاعم والمحلات وبجانب جميع الأماكن السياحية وكلهاwalking distance .
الأماكن السياحية
تعتبر بودابست من المدن الغنية بالأماكن السياحية وممكن تقضي 10 أيام بس تتفرج على كل الأماكن اللي هناك لكن للأسف كان معنا فقط 4 أيام، فأنا رح اقترح لكم Itinerary أو خطة ليومين، تغطي أهم الأماكن اللي لازم الواحد يزورها هناك.
اليوم الأول (نصف نهار)
وصلنا على الشقة الساعة 6 مساءاً. وخرجنا بعدها بساعة لصرف المال. ثم انطلقنا لاستكشاف المدينة.
1. السوق الداخلي: The Great Market Hall
أول محطة لإلنا كانت الGreat Market Hall وهو سوق داخلي كبير جداً. يوجد فيه محلات كثيرة تبيع كل شيء من شراشف وطواقي وهدايا تذكارية، إلى طعام وشراب.
الأكل في الMarket بكون عادة مطبوخ من الصباح ويتم تسخينه بالميكرويف. إذا بدكم تجربة هنجارية أصلية تجنبوا الأكل في مطاعم السوق العظيم لأن المحلات والمطاعم هناك وسياحية والسكان المحليين ما بياكلوا فيها.
2. شراء حاجيات للمنزل
لأننا قاعدين بشقة.. رحنا على سوبرماركت Tesco بجانب الGreat Market Hall لشراء بعض الحاجيات للمنزل، مثل أهم اشي وهو قهوة! طبعاً اشترينا كمان شوية مستلزمات فطور مثل حليب ولبن وكورن فليكس وشوفان. يعتبر Tesco من السوبرماركتات الاقتصادية اللي أسعارها رخيصة بالمقارنة مع السوبرماركتات الأخرى.
Budapest Eye .3
في طريقنا للمطعم اللي رح نتعشى فيه مررنا بال Budapest Eye لكن كنا جداً تعبانين فما ركبناه. بس أخذت صور له!
4. العشاء
مطعم البرغر: Bamba Marha Burger Bar هو من المطاعم الأفضل تقييماً على TripAdvisor، فقلت انه لازم نجربه. المطعم له عدة أفرع في بودابست فبإمكتنكم تختاروا الأقرب لمنزلكم! البرغر كان كتير زاكي، بنصح فيه 100%.
اليوم الثاني
1. مكتبة Metropolitan Szabo Ervin
شفت هاي المكتبة على الأنترنت بالصدفة لما كنت فاتحة مقال لBuzzfeed عن أجمل مكاتب في العالم. وبالفعل هذه المكتبة فاقت توقعاتي.
تقع المكتبة في Wenckheim Palace وقد تم بناؤها في القرن التاسع عشر كقصر للكونت وينكهايم. بعدها تم شرائها من من قبل مجلس المدينة وتحويلها لمكتبة عامة.
اذا انتو من عشاقHarry Potter ما تضيعوا الفرصة انكم تزوروها!
2. الفطور
من أطيب الأماكن اللي أكلت فيها هي London Coffee Society. الموظفين كتير لطيفين والأكل خرافي. إذا حابين تعرفوا شو تطلبوا بالمطعم واقتراحات مطاعم تانية اكبسوا هون: الأكل والمطاعم في بودابست
3. ترام رقم 2
هذا الترام بمر بكل الأماكن السياحية من جهة بست وهو بالضبط على نهر دانوب ويطل على كل الأماكن السياحية من جهة بودا، مثل Fisherman’s Bastion, Budda Castle, Gellert Hill, Elizabeth Bridge, Chain Bridge, Matthias Church وغيرها من الأماكن السياحة. أحسن شيء هو أخذ الترام هذا باتجاه البرلمان الهنجاري والوقوف هناك لبدء الرحلة السياحية (مشياً على الأقدام).
4. البرلمان الهنجاري
يعتبر من أهم المعالم السياحية في بودابست لكن للأسف لقصر الوقت لم نتمكن من الدخول إليه وعمل tour فيه.
Chain Bridge .5
بعد عمل جولة خارجية حول البرلمان يمكنكم الآن التوجه نحو Chain Bridge وقطعه للتمكن من الوصول إلى الجهة المقابلة من النهر والمعروفه ببودا.
6. القطار الجبلي Buda Castle Hill Funicular
القطار الجبلي يسمح للزوار بالوصول إلى هضبة بودا من الأعلى وهناك نجدBudda Castle Fisherman’s Bastion و Matthias Church.
7. كنيسة Matyas أو Matthias Church
كنيسة تعود أصولها ل1600 ميلادي. تتميز بسقفها المزخرف ببلاط ملون على شكل لآلئ.
8. برج Fisherman’s Bastion
وهي أبراج مراقبة تم بنائها في القرن التاسع عشر.
الأبراج تطل على جهة بست ومنها يمكن رؤية البرلمان الهنجاري من فوق! البرج شكله زي قصر ديزني (للي بحبوا Disney ما تفوتوه!).
9. وجبة خفيفة أو Snacks
طبعاً إذا انتو مثلنا.. هلا رح تكونوا بديتوا تجوعوا! في محل حلويات صغير جداً اسمه Budavari Restevar ببيع Hungarian Strudel قريب جداً من Fisherman’s Bastion. بنصحكم تطلبوا قهوة وStrudel تفاح أو Strudel جبنة! للأسف ما عندي صورة للأكل لأنه كنا كتير جوعانين فأكلنا كل شيء بسرعة ههه..
10. منتجع وحمامات جيليرت أو Gellert Baths
هذه الحمامات تم بنائها في بدايات 1900م. يوجد فيها برك ساخنة، مياهها مستمدة من الحمات المائية في هضبة جيليرت أو Gellert Hill.
تتراوح حرارة الماء في برك السباحة من 35-40 درجة سلسيوس، بالإضافة إلى وجود العديد من الSaunas والبرك الباردة وغرف المساج وغيرها.
11. العشاء
مطعم Grill Mania هو مطعم مشاوي كتير زاكي بجانب حمامات Gellert.
اليوم الثالث
1. الفطور
مطعم Cirkusz هو مطعم مختص بالفطور والbrunch، اقترحه علينا أصدقاء وكان الأكل طيب!
2. المقهى الشهير: New York Café
تم بناء بناية New York Cafe عام 1894 من قبل "شركة نويورك للتأمين على الحياة" لتكون المركز الرئيسي للشركة. ثم بعد سنين طويلة أصبحت فندق فخم بالإضافة إلى وجود الكافيه اللي بزوره مئات السياح يومياً!
الكافيه كتير مرتب وغالي نسبياً: سعر كاسة الشاي 8 يورو. في Live Music كل الوقت في الكافيه وبتتغير الband كل نصف ساعة!
3. التسوق
بعد New York Cafe، ممكن اللي بحبوا التسوق يروحوا على شارع Vaci Utca اللي فيه كل محلات الملابس والمحلات اللي بتبيع هدايا تذكارية.
4. قصر Vajdahunyad والتزلج على الثلج
أحلى شيء بحلبة التزلج هاي انه موقعا بالضبط عند قصر Vajdahunyad والمنظر خرافي خاصة باليل لما يكون القصر مضوي!
*ملاحظة: حلبة التزلج بتسكر ساعتين خلال اليوم فأحسن تتفقدوا ساعات العمل قبل ما تروحوا!
5. على حلبة التزلج Snack
في على حلبة التزلج أكمن كشك صغير ببيع أكل وشرب. أزكى اشي تشتروا الHungarian Chimney Cake من هناك. بكون الطقس بارد والChimney Cake ساخنة ومغطاة بالسكر والقرفة!
6. ميدان الأبطال أو Heroes Square
بالضبط خارج حلبة التزلج. هو عبارة عن ساحة موجود فيها نصب تذكاري ضخم يمثل قادة القبائل السبعة التي كونت المجر في القرن التاسع الميلادى. (مأخوذ من ويكيبيديا)
7. العشاء
مطعم Getto Gulyas هو مطعم هنجاري يقدم أكل هنجاري محلي. اطلبوا الشوربة Gulash مع خبز. أفضل محل أكلت فيه Gulash. إذا حابين تعرفوا شو تطلبوا كمان اكبسوا هون
8. حي رقم 7 أو District VII
مدينة بودابست مقسمة إلى 10 أحياء، وأجمل حي في الليل هو حي رقم 7. الحي ممتلئ بالمطاعم والأسواق ويعج بالزوار والسكان المحليين ليلاً نهاراً.
اليوم الرابع
1. الفطور
سيمبلي أو Szimply هو المطعم الصغير جداً يقدم الفطور كل النهار وتتغير لائحة الطعام Menu كل موسم. المطبخ مفتوح أمام الزبائن ويمكن رؤية الشيف وهو يطبخ الأكل ويزين الصحون بطريقة فنية بملقط وفرشاة رسم.
2. منتجع سيتشيني الصحي Széchenyi Thermal Baths
مثل Gellert Baths بس أكبر بكثير وأحلى. إذا معكم وقت بس تزوروا واحد زوروا هذا (مش Gellert).
حمامات Széchenyi هي أضخم حمامات علاجية في كل أوروبا.
يوجد 21 بركة داخلية وخارجية بالإضافة إلى Saunas, Steam rooms وجاكوزي. تتراوح حرارة البرك من 18-40 درجة سلسيوس. والساونا من 50-100 درجة سلسيوس.
*ملاحظة: شراء تذكرة عادية تسمح لكم بدخول كل هذه الأشياء (مش بس البرك الخارجية)
3. البرلمان في الليل
منظر البرلمان في الليل: حاجة تانية خالص! البرلمان مضوي بطريقة فنية غير عادية، بالإضافة إلى أن جميع الأماكن التاريخية على جهة بودا بتكون برضوا مضوية بالليل والمنظر بهبل. بنصحكم ما تفوتوا المنظر بالليل. أفضل مكان لرؤية البرلمان هو من جهة بودا، عند فندق Novotel Budapest Danube.
ممكن بعد رؤية البرلمان تكملوا مشي باتجاه Elizabeth Bridge مشان تشوفوا كل المعالم في الليل. المشي هناك بجنن لأنه شارع المشاة على النهر ويطل على المدينة.
4. العشاء
طبعاً بعد قضاء يوم طويل جدا بماء حارة ومشي كتير رح تكونوا ستطلتوا! احنا ما كان في مجال نفكر وين بدنا نتعشا فأول ما شفنا مطعم Vapiano توكلنا على الله ودخلنا!
وهيك ما ضل غير تحجزوا سفرتكم لبودابست! اذا رحتوا من قبل خبروني كيف كانت تجربتكم في التعليقات.
وإذا حبيتوا المدونة ما تنسوا تعملوا شير مع اصحابكم وعائلاتكم! سفر سعيد!